Prime Minister thar lakluhna turah BIMSTEC hruaitute sawm

Bay of Bengal Initiative for Multi-Sectoral Technical and Economic Cooperation (BIMSTEC) member ram hruai­tute chu May 30-a Prime Minister Narendra Modi lakluh inkhawm neiha telpui turin sawm an ni. 

Pathianni-a President office thuchhuah chuan May 30, Ningani zan dar 7-ah President Ram Nath Kovind chuan kum 65 mi, Narendra Modi chu rinawmna thu tiam tirin prime minister thar atan a lalut dawn tih a tarlang. Hemi rual hian Union Council of Minister-te pawh lakluh nghal an ni ang.

BIMSTEC-ah hian member pasarih an awm a, chungte chu- Bangladesh, India, Myanmar, Sri Lanka, Thailand, Nepal, leh Bhutan-te an ni a, kum 1997 June thlaa Bangkok Declaration kaltlanga din a ni. Modi-a lakluhna inkhawmah hian Bangladesh tih loh, BIMSTEC member ram hruaitulute chu an tel thei vek tura ngaih an ni. Bangladesh Prime Miniser Sheikh Hasina chu ramdang tlawh tura a zinchhuah lai a nih avangin a tel thei dawn lo a, a aiawh turin a cabinet member senior ber Liberation War Affairs Minister AKM Mozammel Huq a tir dawn a ni. 

Kum 2014 khan a ṭum khatna atana prime minister atana Modi lakluh a nih khan South Asian Association for Regional Cooperation (SAARC) ram hruaitute chu sawm an lo ni tawh bawk a, hetihlaia Pakistan prime minister Nawaz Sharif-a pawhin a rawn telpui a ni. Mahse kuminah erawh chuan Pakistan hi sawm tel an ni lo. 

Prime Minister thar lakluh inkhawma tel tur hian BIMSTEC hruaitute bakah Kyrgyz Repub­lic president leh Shanghai Coope­ration Organization Chairman-te chu sawm an ni a, Mauritius Prime Minister leh kumina Pravasi Bhartiya Divas-a khuallian atana hman chu sawm an ni bawk a ni. 

Modi hian a cabinet tharte hi a la tifel lo nia sawi a ni a, mahse May 30-a a ruala lakluh turin tihfel hman a tum. BJP president Amit Shah nen cabinet member turte hi an buaipui a, hmel thar dahte pawh an tum nia sawi a ni. Big 4 - Home, Finance, External Affairs leh Defence changtu tur pawh nimin thleng khan an la tifel lo nia sawi a ni bawk.