Arun Jaitley-a'n cabinet minister-a telh duh tawh lo

Bharatiya Janata Party (BJP) hruai­tu hlun leh Union Finance Minis­ter hlui Arun Jaitley-a chuan nimin khan Prime Minister Narendra Modi-a lehkha a thawn a, a hriselna a ṭhat tawk loh avangin BJP kaihhruai Natio­nal Democratic Alliance (ND) sorkar tharah cabinet minister-a telh lo turin a ngen. 

Narendra Modi hi vawiin hian prime minister term hnihna chelh turin lakluh a ni dawn a, a rual hian a cabinet member-te pawh lakluh an ni ang. Modi hnena lehkha a thawnah Jaitley chuan tunhnaiah a hriselna dinhmun a ṭha tawk lo hle tih sawiin, hei vang hian mawhphurhna pe tawh rih lo tura a duh thu a sawi. Inenkawlna tura hun pe zawk tura ngenin, sorkar tharah eng mawphurhna mah pe lo se a duh tih a sawi a ni. 

Arun Jaitley chuan Modi-a kaihhruai sorkar hmasaa a tel thei chu atan thil lawmawm tak leh inzirna ṭha tak a ni tih a  sawi a, NDA sorkar hmasa leh eptu lama an awm laia BJP-in mawhphurhna pawimawh tak tak an pekte chu a tan chuan a lawmawm hle tih a sawi bawk. "Mahse thla 18 kalta chhung khan taksa lamah harsatna hrang hrang ka tawk a ni. Ka doctor-te pawhin ka mawhphurhna neih hrang hrang lak aṭanga chawl turin min rawn a ni," tiin a sawi. Mawhphurhna pawimawh pe lo tura a ngen rualin, sorkar leh an party tan chuan a theih anga a thawh chhunzawm zel tur thu a sawi. 

Vawiina PM thar lakluh ruala minister lakluh turte hi an hming puanzar a la ni lo. Prime Minister Narendra Modi leh BJP president Amit Shah-te chuan Thawhlehni zan khan Council of Minister thar turte hi an ngaihtuah a, darkar nga zet meeting an nei a ni. Modi-a rual hian minister 65 vel lakluh an ni dawn nia sawi a ni a, ministry tharah hian kum upa zawk, tawnhriat lo ngah tawh leh la ṭhalai zawkte inpawlh rual taka dah tum nia sawi a ni bawk. Minister tharte chanpual tur hi Modi leh Shah-te hian an la sawidun leh dawn a ni. 
Sorkar thar lakluh in­khawm hi zanin dar 7-ah Rashtrapati Bhavan tualah neih a ni ang.