Shiv Sena-te'n Ram temple sak ngai pawimawh turin ngen

NDA hnuaia BJP thawhpui, Shiv Sena chuan Prime Minister Narendra Modi-a kaihhruai sorkar thar ding tur hnenah Ayodhya hmuna Ram temple sak tur chu ngai pawimawh tura ngenin, temple sak hna chu ṭan thuai tura an duh thu an tarlang.  

Shiv Sena chuan an party chanchinbu, Saamana-a edi­torial-ah hemi chungchang hi sawilangin, Lok Sabha inthlanpui neih zawh taka result chu ram mipuiten Ram Rajya leh Ram temple an thlawpzia an lantirna a ni, an ti. RSS hotu Mohan Bhagwat pawhin Lord Ram hnathawh chu tihpuitlin thuai a ni ang, tiin a lo tiam tawh tih a sawi bawk. 

Shiv Sena chuan Ram temple sakna tur hian Hindu puithiam tam takin an nunna an lo hlan tawh a ni, an ti. Sorkar pawhin heng martar leh an thisen chu a thlawnin a luang ral mai lo ang tih chu thupuiah a neih a ngai tih an sawi bawk. Shiv Sena hruaitute hian an party MP thlan tharte nen Ayodhya hi tlawh an tum a ni.