Odisha CM thar lalut

Odisha Chief Minister term ngana chelh turin Naveen Patnaik chu nimin khan rinawmna thu tiam tira lakluh a ni. 

Lok Sabha inthlanpui neih ruala Odisha assembly inthlan neihah Patnaik-a party, Biju Janata Dal (BJD) chu hneh taka thlan tlin an ni. Odisha Governor Ganeshi Lal chuan Bhubaneswar-a Idco Exhibition Ground-a inkhawm buatsaihah Naveen Patnaik hi rinawmna thu a tiam tir a ni. A rual hian a minister turte pawh lakluh tel an ni. Minister atan hian mi 20 lakluh an ni a, an zingah hian hmeichhia pahnih an tel. 

Kum 72 mi, BJD president hian a ṭum khatna atan sorkar thar lakluh inkhawm hi open ground-ah a buatsaih a, tel pawh an ṭhahnem hle. Nimina sorkar thar lakluh inkhawmah hian Patnaik-a farnu leh ziaktu lar tak Gita Mehta leh a unaupa Prem Patnaik-te pawh an tel. 

BJD hian assembly inthlanah seat 147 awm aṭangin seat 112 zet an la pha. Kum 2000 aṭang khan Odisha-ah hian BJD hian thuneihna an la chan chhunzawm zel a ni. CM lakluh inkhawma telpui turin Patnaik chuan Prime Minister Narendra Modi a sawm a, mahse Modi hian a telpui hman lo. Modi chuan a twitter-ah Odisha CM atana rinawmna thu a tiam leh theih avanga Naveen Patnaik a lawmpui thu a sawi a, duhsakna a hlan nghal bawk.