Covid-19 vangin Mughal Garden khar
India ramah coronavirus, Covid-19 a darh chho ve ṭan tawh avangin Mughal Garden pawh vawiin aṭanga mipuite tlawh theih lo tura khar rih a nih thu president Ram Nath Kovind chuan a sawi.
India President chenna, Rashtrapati Bhawan huam chhunga hmun nuam tak leh mite tlawhpawh theiha siam Mughal Garden khar a nih chhan hi, Rashtrapati Bhawan huam chhunga Covid-19 hri hi a darh loh nana tih a ni.
Hriat theih chinah tunah hian India-ah Covid-19 kai hi mi 30 an tling tawh. Ramchhunga a darh chhoh ve tak avang hian prime minister Narendra Modi pawhin Holi Milan programme-a neih tur pawh a ṭhulh phah bawk.
Delhi chief minister Arvind Kejriwal pawhin Delhi-a buaina thleng avang leh Covid -19 darh chhoh mek avangin Delhi-ah Holi hman a ni dawn lo, a ti. Delhi mipuite chu punkhawmna lam huaihawt lo hram turin a ngen bawk. Kejriwal hian a minister zawng zawngte pawh a hmalak dan ang hian an bial mipuite hrilh hre turin a chah nghal a ni.
Sorkarin mipui punkhawmna siam lo turin thurawn pe
Sorkar laipui chuan Covid-19 darh zel tur venna turin state zawng zawng chu mipui punkhawmna tur huaihawt lo turin thurawn a pe.
Mipui pungkawm tamna tur ang chi programme chu ṭhulh a nih loh pawhin a neih hun tur tikhawtlai mai turin a ti a ni. Union Health Ministry chuan mipui pungkhawmna reng rengah chuan state sorkar chuan a ṭul anga hri darh zel venna turin hma a la tur a ni tia sawiin, ramchhung hmun hrang hranga mi thiamte chuan mipui punkhawmna buatsaih loh chu Covid-19 darh tur venna pawimawh tak a ni tih an sawi thu an tarlang bawk.