UP-ah CAA dotute hming, thlalak leh address phochhuak

Uttar Pradesh chief minister Yogi Adityanath thupek angin, state sorkar chuan an khawpui Lucknow-a hmun lailiah nikum December thlaa Citizenship Amendment Act (CAA) duh lohna lantirnaa buaina chhuaka inyhnamhnawihte hming, thlalak leh an address a phochhuah.

Heng hming an pho­chhuah takte hi pawisa chawi tura tih an ni bawk a, nikum December thlaa Lucknow-a CAA an do khan thil an tichhe nual a, heng an thil tih chhiatte hi chawi turin UP sorkar chuan a ngen zui bawk a ni. Khawlaia hming an phochhuahte hian an thil tihchhiat man hi an chawi loh chuan an bungrua laksak theih a nih thu state sorkar chuan thuchhuah a siam bawk.

Hming, thlalak leh address phochhuah zingah hian politician Sadaf Jafar, lawyer Mohammed Shoaib, theatre personality Deepak Kabir leh IPS officer hlui SR Darapuri-te pawh an tel bawk. Anni hi man an nih hnuah bail a chhuah an ni a, bail-a chhuahte hian intiamkanna an nei a, sorkar in court a neih leh huna inlan turin an intiam a ni. Nikum December-a thil thleng chungchang hi Allahabad High Court chuan a ngaihtuah a, thil ti sual tia puhte hi an tisual ngei tih finfiahna police lamin an neih loh avangin chhuah an nih thu court chuan a tarlang.