Bangladesh-ah Prime Minister Modi a zin India leh Bangladesh-in MoU panga tal ziak dawn

Prime Minister Narendra Modi chu a lo puan lawk tawh angin nimin khan Bangladesh-ah a zin a, Bangladesh-ah hian ni hnih a cham dawn.

Narendra Modi hi Bangladesh prime minister Sheikh Hasina chuan Dhaka Airport-ah a lo hmuak a, National Martyrs Monument, Savar-ah kal nghalin hetah hian Bangladesh ram tana nunna hlantute zahna a hlan nghal a ni.

Modi hian twitter kaltlangin Sheikh Hasina chu lawmthu hrilh nghalin an ram a tlawhna chuan ram pahnih inkara inkungkaihna ṭha zawk a awmna tur atan rah ṭha tak a chhuah dawn tih a sawi. Prime Minister hian nimin khan Bangladesh-a minority community aiawhte a kawm nghal a, chawhnu lamah chuan  Bangladesh National Day Program-ah khual zahawm a ni nghal bawk.

India leh Bangladesh-in MoU panga tal ziak dawn: Bangla Foreign Minister
Bangladesh Foreign Minister Dr AK Abdul Momen chuan an rama Prime minister Narendra Modi a cham chhung hian India leh Bangladesh chuan  Memorandums of Understanding (MoU) panga tal an ziak dawn tih a sawi.

Dr AK Abdul Momen chuan Narendra Modi-in an ram a tlawh chhan ber chu an ram zalenna golden jubilee hmanpui tur leh 'Bangabandhu' Sheikh Mujibur Rahman piancham kum 100-na lawmpui tur ni mah se vawiin lamah hian Sheikh Hasina nen meeting pawimawh tak an nei dawn tih leh hetah hian MoU eng emaw zat an ziak dawn a, panga ai chuan a tlem dawn lo niin a sawi a ni.

PM Modi chuan vawiin hian 'Bangabandhu' Sheikh Mujibur Rahman thlan, Tungipara, Gopalganj district-a mi chu a tlawh dawn a, Jeshoreshwari leh Orkandi temple-te pawh a tlawh bawk ang. Chawhnu lamah Ms Hasina chu a office-ah inbiakna pawimawh tak a neihpui dawn a, hetah hian MoU-te hi an ziah rin a nih bakah virtual-in project eng emaw zat a hawng dawn a ni. Chumi hnuah chuan Bangladesh President Md Abdul Hamid chu a chenna inah a hmu dawn bawk a ni.

Modi hi hripui len hnua ram danga a zin leh hmasak ber a ni a,  Bangabandhu piancham lawmna pual hian ni 10 chhung hun hman a ni a, March 17 aṭang khan hman ṭan tawh niin Maldives president Ibrahim Mohamed Solih, Nepal president Bidya Devi Bhandari, Sri Lanka prime minister Mahinda Rajapaksa leh Bhutan prime minister Dr Lotay Tshering -te chuan he hun hman mek hi an lo telpui tawh bawk.