Sunrise Hospital-a kangmei chhuakah mi 10 thi

Mumbai-a Bhandup area-a Dreams mall-ah  Sunrise Hospital-ah Ningani zan khan kangmei a chhuak a, mi 10 an thi. 

Sunrise Hospital hi mall building chhawng thumnaa awm niin, Covid-19 hri kaite enkawlna atan hman a ni. Damdawi-ina damlo enkawl lai 76 zingah  73 chu Covid-19 hri kai niin an zinga parasih chu ventilator hmanga enkawl mek an ni. Kangmei chhuah hnu hian Covid-19 hri kai enkawl laite hi Mulund Jumbo centre-ah sawn niin, dam lo dang pathum chu Fortis Hospital-ah sawn an ni. 

Mumbai DCP Prashant Kadam chuan Ningani zan dar 12.30 velah mall first floor-ah kangmei hi a chhuah ṭan tih sawiin, kangṭhelh motor 14 leh jumbo water tanker 10 chu kang ṭhelh tur hian tirh nghal an ni tih a sawi. Mumbai mayor Kishori Pednekar chuan kangmei chhuahna hmun hi nimin khan tlawh nghalin, kangmei chhuah chhan hi chhui chian a ni dawn tih a sawi. 

Maharashtra chief minister Udhhav Thackeray chuan kangmei chhuak vanga thi chhungte hnenah cheng nuai nga ṭheuh pek an nih tur thu a puang nghal bawk.