Ni khatah hri kai thar 59,000 chuang awm

 Union health ministry-in a tarlan danin, Ningani khan India ramah Covid-19 hri kai thar mi 59,118 an awm belh leh a, hei hi ni 159 chhunga ni khata hri kai thar an tam ber ni a ni leh. Hri kai tharte nen hian ram puma Covid-19 hri kai hmuh chhuah tawh hi mi vaibelchhe 1.18 an tling tawh a ni. 

Hri kai thar an pun belh zel avangin hri kai enkawl mek pawh nimin khan nuai li an chuang leh tawh. Hri kai mek hi ni nga chhung lekin nuai thum aṭangin nuai liah an thleng chho hman a ni. Hri enkawl dam, recovery rate chu 95.09% ah a tlahniam bawk. 
Ni 16 chhung chu a zawnin hri kai thar hian pun lam an pan tawh a ni. 

Covid norms bawhchhiate 'No-Fly' list ah telh dawn
Union Civil Aviation Minister Hardeep Singh Puri chuan hri darh zel tur venna atana sorkarin SoP leh guideline a siamte zawm ṭha tura mipuite ngenin, airport thuneitute hennah Covid norms bawhchhiate chu 'no-fly' list-ah telh zel tura hriattir an nih thu nimin khan a sawi. 

Minister chuan, "Covid-19 hripui hi kan hneh thei a, mahse mi ṭhenkhat inthlahdah avangin harsatna a awm phah ṭhin a ni. Hei vang hian Directorate General of Civil Aviation (DGCA) chu a thuneihna hmang tura hrilh a ni a, thu awih lote chu thlawhtheihna hmanga an zin khapsakin,  'no-fly' list-ah an dah mai dawn tih a sawi a ni.