March 11 thleng RS inkhawm titawp

Rajya Sabha rorel inkhawm chu eptu member-ten tun hnaia Delhi khawpui chhunga buaina chhuak chungchang avanga rorel thei loa inkhawm an aupui reng avangin March 11 thleng atan tihtawp a ni. 

Nimina rorel inkhawmah, House chairman M Venkaiah Naidu chuan member-te chu Rajya Sabha inkhawm tluang taka kalpui a nih theih dan ngaihtuah turin a ngen. Eptu party-te hian Delhi buaina thleng chungchang hi House-ah sawiho an phut a ni. Niminah pawh sawiho phutin an au buai leh a ni. Rajya Sabha bakah Lok Sabha pawh rorel mumal thei loin an awm a ni. 

Delhi hmarchhak biala Citizenship Amendment Act (CAA) thlawptute leh dodaltute inkara buaina chhuak vang hian mi 53 an thi a, mi 200 chuangin hliam na tak an tuar bawk. Venkaiah Nadu chuan Parliament in hnih, Rajya Sabha leh Lok Sabha-a rorel mumal thei loa an awm chu pawi a tih thu a sawi. Thil pawimawh tak tak ngaihtuah tur a awm lai a, member-ten rorel inkhawm kalpui thei loa an aubuai ṭhin chu ṭha lo a tih thu a sawi. Member tin, rorellai leh eptu lamte pawh chuan an harsatna neite chu sawiho a chingfel turin a ngen a, House rorel inkhawm ṭha tak leh awmze nei tak a awm theihna tur ngaihtuah ṭheuh turin a ngen bawk a ni.