Nikum October hnua hri kai tam ber ni thleng

India ramah kar liam ta Inrinni khan Covid-19 hri kai thar mi 62,714 an awm belh leh a, nikum October 16 hnua ni khata hri kai thar an tam ber ni a thleng. 

Health ministry data-a a lan danin, ram pumah ni 18 chhung chu a zawnin hri thar hi an pun belh zel a, Zirtawpni leh Inrinniah  hri kai thar hi 60,000 chuang ve ve an ni bawk. Hri kai hmuh chhuah tawh hi mi vaibelchhe 1.19 an awm tawh a ni. Inrinni vek khan hripui vangin mi 312 an thi bawk a, hei hi nikum December 24 hnua ni khata hri vanga thi an tam ber ni a ni leh bawk. Covid-19 hri thipui hi India ramah mi 1,61,552 an tling tawh. Hripui vanga thi zinga 90% dawn chu kum 45 chunglam an ni. 

Hri kai thar an pun belh zel avangin enkawl dam, recovery rate pawh a tlahniam zel a, 94.58% ah a tlahniam tawh a, thihpui zat hi hri kai hmuh chhuah aṭanga 1.35% an tling bawk. Union health secretary Rajesh Bhushan chuan tun hnaia hri kai pun zualna state leh UT 12-te chu Zirtawpni khan high-level review meeting a neihpui. Review meeting-ah hian NITI Aayog member (health) Dr VK Paul pawh a tel. Hri leng hluar thar lehna state/UT te hi - Maharashtra, Gujarat, Haryana, Tamil Nadu, Chhattisgarh, Madhya Pradesh, West Bengal, Delhi, Jammu and Kashmir, Karnataka, Punjab leh Bihar-te an ni. 

Maha-ah zan curfew puang
Ram chhunga hri kai tamna leh thihpui tamna ber state, Maharashtra-ah chuan nizan aṭang khan zan lam curfew puan a ni a, shopping mall-te pawh zan dar 8 aṭanga a tuk zing 7 thleng khar tir vek an ni. 

Maharashtra-ah hian Covid-19 hri kai an pung chak chho leh hle a, kar liam ta chhung khan ni nga chhungin hri kai thar hi nuai 1.3 chuang an awm hman a ni. Chief minister Uddhav Thackeray chuan state mipuite chu Covid-19 darh tur venna atana sorkarin dan leh kaihhruaina a siamte zawm ṭha turin a chah nawn leh a, dan hi zawm ṭhat a nih loh chuan sorkarin khuahkhirhna khauh zawka a kalpui tur thu a sawi. Lockdown puan a ṭul leh ṭul loh chu district hotuten an ngaihtuah dawn a, state pum huapa lockdown puan a ṭul a nih chuan mipuite  hriattir lawk an nih tur thu a sawi. Naded leh Beed-ah chuan hri kai an pun chak avangin local government-ten ni 10 chhung atan total lockdown an lo puang tawh a ni.