India leh Bangladesh-in MoU panga an ziak

India leh a ṭhenawm ram Bangladesh chuan Memorandum of Understanding (MoU) panga insumdawn tawnna, IT leh infiamna lamah an ziak.

Prime minister Narendra Modi chu Zirtawpni leh Inrinni khan Bangladesh-ah a zin a, hetah hian an ram mi pawimawh hrang hrang meeting neihpuiin Inrinni khan Bangladesh Prime minister Sheikh Hasina nen inbiakna pawimawh tak an nei a, hemi hnuah hian MoU hi ziah a ni.

Ram pahnih Prime Minister-te hian hriselna, insumdawn tawnna, inkalpawhna leh energy bakah ram pahnih hmasawnna tur kawng hrang hrang an sawi dun a, commerce leh trade, water resource, security leh defence bakah power chungchangte chu an sawi dun pawimawh leh langsar te a ni bawk.

Ram pahnih hruaitute chuan Dhaka leh New Jalpaiguri inkara 'direct passenger train', ‘Mitali Express’ chu tlantir an remti a, hemi bakah hian India chuan Bangladesh hnenah hian ambulance 109 leh Covishield vaccine dose maktaduai 1.2 a pe bawk a ni. India chuan ram pahnihin kum 50 chhung inkungkaihna ṭha tak an nei tawh tih chhinchhiahna turin pawisa thir (silver coin) an tlangzarh bawk a, Bangaldesh pawhin Mujib Borsho an hriatrengna lantirna atan pawisa thir (gold coin) an tlangzarh ve bawk.

Foreign Secretary Harsh Vardhan Shringla chuan PM-in Bangladesh a tlawhnaah hian Civil nuclear leh space sector-ahte thawhdunna thar nei ram pahnih hruaitute chuan an remti tih a sawi. 1971 Liberation War of Bangladesh-a India sipai nunna chante hriatrengna tur siamna tur lungphum ram pahnih hruaitute chuan Ashuganj-ah an phum bawk a ni.