Mann Ki Baat Covid-19 vaccine la vek turin mipui a sawm

Prime minister Narendra Modi chuan nimin khan thla tina radio programme a hman ṭhin, Mann Ki Baat hun a hmang leh a, hetah hian India ram mipui zawng zawngte chu Covid-19 vaccine la vek turin a sawm.

India ram chuan khawvela vacci­nation programme liam ber a kalpui mek tih sawiin, kum 100 chung lam mi eng emaw zatin vaccine chu an la tawh a ni, a ti. Covid-19 dona kawnga thil pawimawhte chu kan hre nawn leh ṭheuh tur a ni, tia sawiin, mi tinte chu Covid-19 vaccine la ṭheuh turin a sawm a ni.

Narendra Modi chuan nikuma March thlaa Janata Curfew neih a nih chungchang sawi lang lehin,"Nikum March thlaah khan India ram chuan a vawi khatna atan Janata Curfew tih an hre thar a ni. Kha thil kha tehkhin theih loh khawpa mahni inthunna entirna a ni a, chhuan lo la kal leh zel tur pawhin an inchhuan pui tur a ni," a ti.

Corona beihna kawnga hmatawngte hnena lawmthu sawina atana thawm chhuah a nih dante kha thlir let lehin mipui bakah Covid-19 dona kawnga thawktute hnenah lawmthu a sawi. Mitali Raj chungchang pawh sawi chhuakin, women cricket-a run 10,000 a siam theih avangin a lawmpuina thu a sawi bawk a ni.

Loneitute chu an sum lakluh a pun theihna turin tuna an kalpui dan bak thil thar an kalpui a ngai tih sawiin, bee wax vanga hriat hlawh ram kan ni a, loneitute pawhin bee-farming lamah ṭan la se ka duh a ni, a ti. Nimina PM-in 'Mann Ki Baat' programme a hman kha a vawi 75-na  a ni tawh a, kum 2014 October 3 aṭang khan he programme hi hmang ṭanin kum ruk chhung chu he programme hi a hmang tawh a ni.