CAA duh lohna lantirnaah Ni 4 chhungin inkahna vawi 3 a thleng

Delhi-a Citizenship Amendment Act (CAA) duh lohna lantir a nih hnuah Pathianni zan khan Jamia Millia Islamia University-a gate no.5-ah mi pahnihin silai an hmet puak.

Silai hmet puaktute hi tute nge an nih hriat ni lo mah se, Jamia Coordination Committee (JCC) chuan silai kaptu pakhat hian jacket sen a hak thu leh scooty sena an tlanchhiat thu an tarlang. An scooty number hi 1532 emaw 1534 a nih thu JCC chuan a tarlang bawk. 

Pathiannia thil thleng hi zan dar 11.30 vel nia sawi a ni a, he thil thleng hi hriat a nih hnuah mi emaw zat an pung khawm nghal a ni.  Jamia leh a chheh velah hian silai hmehpuahna hi ni 4 chhungin vawi thum a thlenna a ni a, kar liam ta Ningani khan CAA duh lohna lantira Jamia zirlaite'n kawng an zawhnaah, kawng zawhte tibuai turin mi pakhatin silai a lo hmet puak tawh a, Inrinni khan kum 25 mi, Kapil Sharma chuan CAA dodalna lantira sit-in protest neihna hmun, Jamia Nagar-a Shaheen Bagh-ah silai a lo hmet puak ve leh bawk a ni. 

Jamia Millia Islamia University-a  Mass Communication Research Centre chuan Arnab Goswami-a ta, Republic TV chu kumina placement process atan an boycott. 

Republic TV hian kar liam ta Ningani-a Jamia zirlaiten CAA duh lohna lantir kawng an zawh laia silaia beitu chu Jamia zirlai leh, CAA duh lohtu zinga mi niin a report a ni. Mahse a hnuah silai hmetpuaktu hi Uttar Pradesh mi a ni tih hriatchhuah a ni. 

He thil thleng a report-naah, Republic TV hian pawikhawihtu hi CAA dodaltu zinga pakhat, Jamia zirlai a ni tiin a sawi a, a hnua Jamia zirlai a ni lo tih hriat chian a nih hnuah channel hian nawrh huaihawtte chu buaina chawk chhuakah a chhuah zui leh a ni. Hei vang hian Jamia media department lam chu an lungawi lo a, kumina placement drive an neih turah Republic TV aiawhte an kal an khap dawn tih an sawi.