Nu leh pa vote thlak tura hneh turin naupangte zirtir

Maharashtra-a Palghar district-ah chuan school naupangte chu Lok Sabha inthlanpui awm turah an nu leh pate vote thlak ngei tura hneh a, vote thlak pawimawh ziate hrilh hre turin zirtir an ni. 

He campaign-naah hian Palghar biala school 3,000 chuanga zirlai naupang nuai li vel zet an tel niin district information office chuan a sawi. Kar hmasa khan zirlai naupangte hian an zirtirtute kaihhruainain, an school ṭheuhah an nu leh paten inthlanah vote an thlak ngei theihna atan hma la turin thutiam te an la a ni. 

District Collector Prashant Narnaware chuan naupangte zinga campaign an neihpui chuan Lok Sabha inthlan leh inthlan dang lo awm zel turah pawh nghawng ṭha tak a neih ngei an rin thu a sawi. Zirlai leh naupangte chu nu leh pate hnenah vote thlak pawimawhna thuchah thehdarh tura ṭha ber an nih thu a sawi. 

Maharashtra-ah hian Lok Sabha seat 48 awmin inthlan hi thawh li - April 11, 18, 23 leh 29-ah te neih a ni ang. State pumah hian vote nei mi 8,73,30,484  awmin an zinga  4,57,02,579 chu  mipa an ni a, hmeichhia 4,16,25,819  leh transgender 2,086 vote nei an awm bawk.