Congress-in 2019 Lok Sabha election manifesto tlangzarh Loneitute pualin budget hran siam tiam

Congress Party chuan nimin khan kumin Lok Sabha election neih tura an party manifesto chu New Delhi-ah an tlangzarh. 

Congress manifesto, 'Hum Nibbhayene' tlangzarh inkhawm hi Akbar Road-a party headquarters-ah neih niin, party president Rahul Gandhi-an a tlangzarh a ni. He hunah hian party hruaitu lawkte chu an tel vek a ni. Rahul Gandhi chuan Congress manifesto-ah party symbol, kutphah lantirna thil pawimawh panga dah a nih thu a sawi. He manifesto hi mimal pakhat thlir dan aṭanga siam mai ni loin, mi chi hrang hrang an kawmna aṭanga duan a ni, a ti. 

Gandhi chuan manifesto-ah hian hna thar siam, loneitute harsatna chinfelna tur, education leh health sector thuam chak bakah ram economy ṭhanna chak zawka kalpuina turte chu dah pawimawh a ni tih sawiin, loneitute pualin budget hran siam tum a ni tih a sawi bawk. 

Prime Minister hlui Manmohan Singh chuan, "Mi hrang hrang, dinhmun hrang hrangte kawm kual hnuah hei hi siam a ni. Manifesto hian a tum chu party-in hmathlir a neih ṭha takte tarlang a, ram economy dinhmun ṭha zawk siamna tura hma lam panpui a ni",  a ti. Congress kaihhruai UPA-in kum 10 sorkarna a chan chhung khan mi rethei maktaduai 140 zet chu an dinhmun aṭanga khaichhuah an ni tih sawiin, kum 2030-a retheihna umbo chu an tum tih a sawi. 

Congress manifesto committee hi finance minister hlui P Chidambaram-an a ho a ni. Chidambaram chuan manifesto-ah hian loneitu, ṭhalai, Dalit, hmeichhia, industry, security, foreign policy, hmarchhak state -te dinhmun siamṭhatna tur bakah thil dang tam tak a tel tih a sawi. 

Manifesto-ah hian party president pawhin a lo sawi tawh, ramchhunga mi rethei zual 20% te chhawmdawlna tur, minium guarantee scheme, NYAY scheme chu tarlan a ni. He scheme hnuaiah hian chhungkaw rethei thlante hnenah kumtin Rs 72,000 pek tiam a ni. 
NYAY scheme bakah hna tam zawk siam tiamin, a bul ṭan nan sorkar hnaruak nuai 22 awm mek hnawhkhah a tiam bawk a, hei bakah hian sumdawnna bul ṭanna awlsam zawka kalpui a nih theihna turin phalna chi hrang hrang eng emaw zat lak ngai ṭhin pawh tihtawp a tiam bawk. Congress party chuan sorkar laipui budget-a 6% chu education leh healthcare lam tihchangtlunna atana dah a tiam a, private insurance company-te chu sorkar agency hmanga thlak a tiam. 

Kum 2009-a Congress manifesto-a an lo tiam tawh leh a taka kalpui mek, MNGREGA scheme hmanga ni 100 inhlawhna siam chu ni 150-a tihpunah Congress chuan a tiam bawk. Party president Rahul Gandhi chuan manifesto a tlangzarh hnuah zawhna ṭhenkhatte chhangin, Uttar Pradesh-a a bial, Amethi bakah Kerala-a Wayanad constituency aṭanga chuh tel a tum chhhan chu chhim lam bialte hnena enhran an ni bik lo tih hriattirna leh, inpumkhatna ṭha siamna tura ti a nih thu a sawi. "Chhim lam bial hian Narendra Modi hian a hmelmak bik niin an inngai a ni. Kerala lama ka thawhpuiten chhim lam bial kan thlawpna lantirna tura min ngenna chu chhangin, Kerala aṭanga chuh tel ka tum ta a ni", a ti.