Ka hlawhtlinna ropui ber tur chu Amethi-a Rahul-a chak loh hi a ni ang : Smriti Irani

Lok Sabha inthlan neih tura Uttar Pradesh-a Amethi biala Congress party president Rahul Gandhi nena inkhing tur, BJP candidate leh union minister Smriti Irani-i chuan centre-ah BJP chuan sorkarna a siam leh ngei dawn tih sawiin, a tana hlawhtlinna ropui ber tur chu Amethi biala Rahul Gandhi chak loh chu a ni dawn tih a sawi. 

Smriti Irani chuan Amethi-ah chuan BJP aiawh mai a ni dawn tih sawiin, Rahul Gandhi nena an inbeihna chu mimal thil ni loin, policy lama inbeihna tur zawk a ni, a ti. Irani hian 2014 Lok Sabha inthlanah Amethi-ah hian Rahul Gandhi hi a lo hneh zo tawh lo a ni. 

Rahul Gandhi-an Kerala-a Wayanad bial aṭanga inthlan chuh tel a tum chu Amethi bialah a chak zo dawn lo tih a hriat vangin a tlanchhia niin Irani chuan a sawi a, bial him a zawng niin a sawi. Congress president chu India ram hmasawnna thlen turin a nunphung chuan a pha lo niin a sawi bawk.