India ramah Covid-19 hri kai an pung chak Hri kai enkawl mek nuai nga an chuang leh tawh

India rama Covid-19 hri kai hmuh chhuah thar an pung chak chho leh tawh hle a, Pathianni khan hri kai thar mi 68,020 awm lehin, ram pumah hri kai mek chu nuai nga chuang an awm leh tawh. 

Union health ministry-in a tarlan danin, Pathianni vek khan hripui vanga thi mi 291 awmin, anni nen hian Covid-19 hri thihpui hi India ramah mi 1,61,843 an tling tawh a ni. Hun eng emaw chen hri lengin ziaawm lam a pan hman avangin hri kai enkawl mek pawh an tlahniam chak hman hle a, mahse hri leng hi a rawn hluar chhoh leh hnuah kar liam ta chhung ringawt khan hri kai hi nuai 1.7 chuang awm hmanin, hri kai mek hi nimin khan nuai nga an tling leh tawh a ni. 

John Hopkins University-in a tarlan danin, nimin thleng khan khawvel pumah hri kai hmuh chhuah tawh mi 12,70,92,284 awmin, he hri vanga thi hi mi 27,82,944 an tling tawh bawk. US chu hri kai tamna leh thihpui tamna ber ram a la ni chhunzawm zel a, US-a hri kai hmuh tawh hi mi 3,02,62,037 niin, an zinga  mi 5,49,335 in an thihpui tawh a ni. Brazil chu hri kai leh thihpui tamna ram pahnihna a ni a, hri kai mi 1,25,34,688 awm tawhin mi 3,12,206 in an thihpui tawh. 

Covid-19 hri kai maktaduai hnih chuang hmuh tawhna ram dangte chu - India (1,20,39,644), France (46,06,185), Russia (44,69,327), UK (43,47,013), Italy (35,32,057), Spain (32,55,324), Turkey (32,08,173), Germany (27,84,652), Colombia (23,82,730), Argentina (23,08,597), Poland (22,50,991) leh Mexico (22,24,767) te an ni.  

Pathiannia India rama Covid-19 hri kai thar zinga 84.5% hi sate pariat - Maharashtra, Karnataka, Punjab, Madhya Pradesh, Gujarat, Kerala, Tamil Nadu leh Chhattisgarh-a mi an ni. Hemi ni veka hripui vanga thi mi 291 zinga 108 chu Maharashtra ami niin, Punjab-ah mi 69 an thi bawk.