Ka passport pe chhuak duh lo : Mehbooba Mufti

Jammu and Kashmir chief minister hlui leh People's Democratic Party (PDP) president Mehbooba Mufti chuan sorkar laipuiin a passport a dilna chu 'national security' chhuanlama hmangin a pe chhuak duh lo tih nimin khan a sawi. 

Mufti chuan hemi chungchang hi a twitter-ah tarlangin, "Passport office chuan CID report behchhanin, ram himna atana a hlauhthawnawm thei nia sawiin ka passport chu min pe chhuak duh lo a ni. Hei hi kum 2019, August hnua Kashmir-a boruak awm chhoh dan chu a ni. Chief Minister hlui in passport a neih ringawt chu India ram himna tiderthawng theiah ngaih a ni," a ti. 

Kum 2019-a central-a BJP kaihhruai sorkarin Jammu and Kashmir special status pekna a tihtawp sak hnu khan Mufti leh political leader eng emaw zat chu manin hren zui an ni. Hemi hnu hian J&K state chu Union Territory pahnihah ṭhen zui a ni bawk. Political leader an hrente hi chhuah ṭhen an ni tawh a, Mufti pawh hi nikum khan chhuah a ni. 

Srinagar-a Regional Passport Office chuan police verification report a dik loh avangin Mufti passport dilna hi hnawl a nih thu a sawi. Passport officer chuan Criminal Investigation Department (CID)-in a dilna hi pawmsak lo tura a rawt avangin Indian passport a dilna hi hnawlsak a ni tih Mufti hi a hrilh. Hnawl sak anih chungchang hi higher forum-ah a appeal thei tih a hrilh bawk.