House aṭangin eptu MP-te lungawi loin chhuak

Nimina Lok Sabha in­khawmah, President of India thusawi chungchanga motion of thanks sawi tura BJP-in MP Parvesh Sahib Singh Verma an ruat avangin eptu party MP-te chu lungawi loin House aṭangin an chhuak tau. 

MP Verma hian tunhnaiah Citizenship Amendment Act (CAA) duh lohna lantira Sha­heen Bagh-a nawrh huaihawtte chu sawiselin, nakin lawkah heng mite hian mi inah lutin, an farnu leh fanu-te chu an la pawngsual sak ang, tiin a sawi a ni. Hei bakah hian Delhi chief minister Arvind Kejriwal chu firfiak tiin a sawi bawk. A thusawi avang hian Election Commission of India (ECI) pawhin BJP hnenah Delhi assembly election neih tura party star campaigner aṭanga paih turin a lo ti tawh a ni. 

Inhuatna chawktho thei zawnga thu a sawi vanga hriattirna pawh lo dawng tawh, House-a motion of thanks sawi tura BJP-in a thlang chhuak chu eptu party member-te an lungawi lo hle. 

Verma-a'n thu a sawi ṭan dawnah eptu MP 30 vel chu House laiah chhuakin, lungawi lohna thuziakte an keng lang a, hemi hnu hian House aṭangin an chhuak zui a ni.