Rahul Gandhi-an Wayanad bial tan nomination thehlut

Congress president Rahul Gandhi chuan nimin khan Kerala-a Wayanad biala Lok Sabha inthlan chuh turin nomination a thehlut a, a farnu Priyanka Gandhi Vadra leh party hruaitu dangten an ṭawiawm.

Nimin zing khan Rahul Gandhi leh a farnu Priyanka te chuan Wayanad hi helicopter-in an thleng a, Kalpetta-a district collectorate office an pan nghal a ni. Congress worker ṭhahnem takin an lo hmuak a, roadshow an nei nghal a ni.

Congress party chuan kar hmasa khan party president hian Uttar Pradesh-ah a bial, Amethi bakah Kerala-a Wayanad bial aṭangin inthlan hi a chuh tel dawn tih a lo puang tawh a ni.

Nilaini zan khan Gandhi hian Wayanad aṭanga km 73-a hla, Kozhikode a thleng a, Kerala chief minister hlui Oommen Chandy leh Congress thawhpui party dang hruaitute chuan airport-ah an lo hmuak a ni. Rahul Gandhi leh a farnu Priyanka-te hian Kozhikode-ah hian zan riakin, nimin zing hian nomination thehlut turin Kalpetta hi an pan a ni.

Congress president-in bial hniha din a tum hi BJP lam chuan an bei zui nasa hle a, kum 2004 aṭanga a bial lo vawn tawh, Amethi bialah Union Minister Smriti Irani-i nen a ṭum hnihna atan an inkhing leh dawn a, a chak a inrin loh avangin bial him nia a ngaihah a tlanchhia niin an puh. Mahse Rahul Gandhi chuan Wayanad biala chuh tel a tum chhan chu India chhim lam bialte chuan PM Modi chuan a thlauhthla niin an ngai tawh a, hei vang hian chhim lam mite tan a ding dawn tih lantirna atana tih a nih thu a sawi.

Prime Minister Narendra Modi chuan Maharashtra-a rally a neihah Congress chuan Hindu firfiak chungchang sawia Hindu an hmuhsit avangin Hindu tamna bial aṭangin an tlanchhia niin a puh a, Rahul Gandhi-an Wayanad a panna chhan chu he biala mi tam zawk chu sakhua leh hnam tenau zawkte tamna a nih vang a ni, a ti.

Wayanad bialah hian Congress president khing tur hian NDA chuan Bharat Dharma Jana Sena party aṭangin Thushar Vellapally an dah a ni. Wayanad-a hi April 23-ah a inthlang dawn a, Amethi bial hi May 6 ah an inthlang thung ang.