PM tana Rajasthan Governor a campaign vangin EC-in President hnenah a chungchang thlen

Rajasthan Governor Kayan Singh chu Prime Minister Narendra Modi tana a campaign avangin model of coduct (MCC) a palzut tih Election Commission chuan sawiin, a chungchang hi nimin khan President Ram Nath Kovind hnenah ziakin a thlen.

March 23 khan Singh hian reporter-ten an kawmnaah India ram mipuite chuan Modi chu chak leh ngei turin an duh vek a, India ram tan a chak ngei chu la ṭul tih a sawi a ni. Aligarh BJP unit chhunga buaina awm chungchang an zawhnaah pawh, "Kan vaiin BJP worker kan ni vek a, BJP chak chu kan duh vek a ni", a ti bawk. A thusawi hi EC hnenah thlen nghal a ni.

EC-in Governor thusawi chungchang report thehlut tura a tih hnuah, Aligarh district magistrate chuan a thusawi kimchang leh video clip chu Uttar Pradesh chief electoral officer hnenah a thehlut tawh bawk. Hemi hnu hian EC chuan President hnenah Governor chungchang hi ziaka thlenin, a thiltih dan chu Governor office zahawmna a tihniam a ni, a ti.

President hian EC hena aṭanga lehkha a dawn chu Home ministry hnenah an ngaihdan la turin a thawn ve leh a ni. Governor kaihhnawih thil hi President ngaihtuah tur a ni a, hemi rual hian home ministry ngaihdan a la tel ṭhin.

Tun ṭum hi governor zinga MCC palzut an awm vawihnihna chiah a ni. Kum 1990 khan Himachal Pradesh Governor Gulsher Ahmed chu Madhya Pradesh inthlan tura a fapa Sayeed Ahmed tana a campaign vangin EC chuan hriattirna a lo pe tawh a ni. A thuneihna dik lo taka a hman chungchangah EC in a lawm loh thu a sawi hnuin Governor a nihna aṭang hian a bang zui a ni.