US-in Pakistan F-16 fighter jet kim lo a awm loh thu a sawi

India-in February 27-a Jammu and Kashmir-a Indian sipaite hmun rawn beih tum, Pakistan indo thlawhtheihna ṭha, US siam F-16 fightet chu Indian Air Force (IAF) ten an kah thlaksak nia a sawi hnuah, US chuan Pakistan-in F-16 a neih chu a chhiarsak a, kim lo a awm lo niin a sawi.

IAF-ten Pakistan F-16 an kah thlaksak nia an sawi hi Pakistan lam chuan a pha nasa hle a, mahse India lam hian an thusawi hi a dik ngei nia sawiin F-16 aṭanga AMRAAM missile an kahthlaksak them nia sawite chu a lo tarlang tawh a ni.

Pakistan-in India sipaite beihna atana F-16 fighter jet a hmang nia puh hi US pawhin a ngaihven hle a, he indo thlawhtheihna hi ramdang sipaite beihna atan ni lo, firfiakte beihna atan chauha leitir a nih thu sawiin a chhui chian tur thu pawh a sawi a ni. Hei vang hian Pakistan chuan US chu F-16 thlawhtheihna a neih zatte a hmun ngeia chhiar turin a sawm a, hemi hnu hian US chuan Pakistan F-16 neih zet chu chhiarin kim lo a awm lo tih a finfiah ta niin Foreign Policy magazine chuan a tarlang. He hi India-in February thlaa Pakistan fighter jet a kah thlaksak nia a sawi nen an inkalh ta tih magazine chuan a sawi.

Hetihla hian Department of Defence lam chuan Pakista F-16 fighter zat chu a chhiarsak ngei em tih zawhna official-a chhanna a la pe lo.