Covishield vaccine lak hun inkar pawtsei

Sorkar laipui chuan Covid-19 vaccine, Covishield dose khatna leh dose hnihna lak hun inkar chu kar riat thlengin a pawtsei.

A hmain Covishield vaccine dose khatna la tawhte chu an lak aṭanga kar 4-6 inkarah a dose hnihna la tura tih an ni. Sorkar chuan dose hnihna lak hun tur hi kar 6-8 thlengin a pawtsei leh a, mahse kar riat hnuaa lak chu a him loh theih thu a sawi nghal bawk.

Ministry of health and family welfare chuan expert group pahnih - National Technical Advisory Group on Immunisation (NTAGI) leh National Expert Group on Vaccine Administration for Covid-19 (NEGVAC) te thurawn angin, vaccine dose hnihna lak hun tur hi a pawtsei a, kar 6-8 inkara lak nawn lehin hri laka a venna hi a belhchhah zawk nia sawiin a pawtsei leh ta a ni.

January 16 aṭanga ram puma Covid vaccine pek chhuah runpui kalpui chu chhunzawm zel niin, April 1 aṭangin kum 45 chung lam hnenah pek a ni ang. A thawh khatnaah healthcare leh frontline worker-te pek niin, a thawh hnihna kalpui mekah kum 60 chung lam leh kum 45 chin, natna benvawn neite hnenah vaccine hi pek mek a ni. Sorkar chuan vaccine la zo tawhte chu thuneitute hnen aṭanga vaccination certification la vek turin a hriattir.

Nimin zing thleng khan ram pumah Covid-19 vaccine la tawh hi mi 6,11,13,354 an awm tawh, dose vaibelchhe 11 pek an ni tawh. Vaccine la tawh zingah hian healthcare worker dose khatna la tawh mi 81,74,916 leh dose hnihna la zo tawh mi 51,88,747 an awm a, frontline worker zingah dose khatna la mi 89,44,742 leh dose hnihna la tawh mi 37,11,221 an awm bawk. Kum 60 chunglamah vaccine dose khatna la mi 2,82,19,257 awmin, a dose hnihna la zo tawh mi 1,583 an awm bawk. Kum 45 chung lam, natna benvawn nei zingah vaccine dose khatna la mi 68,72,483 awmin, a dose hnihna nena la zo tawh mi 405 an awm bawk.

Thawhṭanni kha vaccinational drive ni 73-na a ni a, hemi ni bik hian mi 5,92,919 ten vaccine hi lain, an zinga mi 5,51,164 chu dose khatna la an ni a, dose hnihna la mi 51,755 an awm bawk a ni.

Vaccine-te hi an him tawk : Health minister

Union health minister Harsh Vardhan leh a nupui Nutan Goel-te chuan nimin khan Delhi Heart and Lung Institute-ah vaccine dose hnihna an la.

Minister Harsh Vardhan chuan India rama Covid-19 vaccine hman mekte chu an him tawk a ni tih sawiin, vaccine chungchanga thuthang dik lo awm ṭhinte lakah inthiarfihlim turin mipuite a chah. "Indian vaccine pahnihte hi an himin an ṭha tawk a ni. Mi tam takin vaccine chungchangah rinhlelhna an la nei fo a, heng mite hnenah hian WhatsApp university-a thu dik lo thehdarh ṭhinte chu ring lo turin ka chah duh a ni," a ti. Vaccine lak tawh hnua hri kai leh chu mi tlemte chauh an ni tiin, heng mite pawh hian an hri kai hi an la na lo a, hospital leh ICU-a dah luh ngaihna tur lakah pawh vaccine an lo lak tawh hian a veng hle dawn a ni, a ti.

Hri kai thar 50,000 chuang awm leh

Thawhṭanni khan ram pumah Covid-19 hri kai thar mi 56,211 an awm belh leh a, hri kai thar zinga 78.56% hi state paruk - Maharashtra, Punjab, Karnataka, Madhya Pradesh, Tamil Nadu leh Gujarat-a mi an ni. Hemi ni vek hian hripui vangin mi 271 an thi bawk.

Ram pumah hri kai mek hi mi 5,40,720 awmin, darkar 24 chhungin mi 18,912 in an pung hman a ni. Hri kai enkawl mek zinga 79.64% hi Maharashtra, Kerala, Punjab, Karnataka leh Chhattisgarh state ami an ni. Maharashtra-ah tam berin, ram pumah Covid-19 hri kai mek zigna 62% chu an state-a mi an ni.