Lok Sabha election : Delhi-ah AAP leh Congress thawkdun dawn

Lok Sabha inthlanpui neih tura Delhi-a rorellai Aam Aadmi Party (AAP) leh Congress party chuan thawhdun tuma an inbiakna chu a hlawhchham nia an sawi hnuah, kar kalta Zirtawpni khan thawkdun tur hian inremna an siam leh thei ta niin an sawi.

Party pahnihte hian thawhdunna tura inremna point pathum an siam a, hei hi Congress lam pawhin pawm tawh mah se party president Rahul Gandhi-a pawmpuina nghah niin Delhi-a a kir hunah an thawhdun tur thu hi official-a puan a ni dawn nia sawi a ni.

Congress senior leader PC Chacko leh AAP Rajya Sabha MP Sanjay Singh-te chuan meeting ṭum hnih neiin inremna hi an siam thei ta nia sawi a ni a, mahse inremna an siam dan hi puanzar a la ni lo. Congress chuan an thawhdunna turah hian an manifesto-ah Delhi chu state puitlinga hlankai phutna an telh dawn nia sawi a ni a, hei hi AAP in inthlan campaign-naa an auhla ber pakhat a ni. Hei bakah hian Delhi-a Lok Sabha seat awm zat chu party pahnihte hian inzatin an insem dawn nia sawi a ni bawk.

Hetihlai hian Delhi-a Congress party hruaitute zingah AAP nena thawhdun duh leh duh loh hi an awm a, Delhi Congress chief hlui Ajay Maken chuan thawhdun hi a thlawp laiin president ni lai Sheila Dikshit-i erawh chuan thawhdun hi a thlawp lo thung.

AAP chuan BJP paihthlakna turin Delhi-a Congress nena thawhdun hi a duh a, mahse Congress hruaitu ṭhenkhat chuan AAP sorkar ning tawh tam tak an awm vangin an thawhdun chuan Congress-in a tawrh phah ve dawn niin an sawi a ni. AAP hian Lok Sabha inthlan tur atana an party manifesto chu April 25 hmain tihchhuah a tum a, manifesto-ah hian state puitlinga Delhi hlankai chu an dah pawimawh ber a nih thu an sawi.