BJP-in election manifesto tlangzarh
Prime Minister Narendra Modi chuan nimin khan Lok Sabha inthlanpui neih tura BJP election manifesto chu New Delhi-ah a tlangzarh. He hunah hian BJP president Amit Shah leh party hruaitu lawkte an tel ṭha hle.
BJP manifesto, Sankalp Patra-ah hian BJP chuan thlan tlin an niha tihhlawhtlin an tiam hrang hrang 75 zet an tarlang.
Manifesto-ah hian BJP chuan Ram Mandir sak ngei a tiam a, India ram mipui eng sakhaw mi pawh dan khat vek hmantirna tur Uniform Civil Code hman te, Parliament-ah Citizenship Amendment Bill (CAB) pass te a tiam bawk. Jammu and Kashmir-a a ram mite humhalhna, Constitution Article 35A hman mek pawh ṭhiah an tiam bawk a ni. .
Amit Shah chuan manifesto buatsaih a nih dawn hian mi hrang hrang vaibelchhe ruk vel zet kawm an nih thu a sawi. Home Minister Rajnath Singh chuan manifesto buatsaih tur hian a kaihhruaina hnuaiah member 20 awmna team din a nih thu sawiin, team member zingah hian union minister Arun Jaitley, Ravi Shankar Prasad, Nirmala Sitharaman, Thaawarchand Gehlot, Piyush Goyal, leh Mukhtar Abbas Naqvi te an tel.
Manifesto-a an thil tiam tlangpui -
• Uniform civil code kalpui
• Firfiakte laka zero-tolerance policy kalpui chhunzawm zel
• Ram temple sak a nih ngei theih dan ngaihtuah
• Citizenship Amendment Bill chu Parliament-ah pass a, a taka kalpui.
• Loneitute zawng zawng hnena Kisan Samman Nidhi hnuaiah hamṭhatna pek.
• Loneitu harsa zawk leh dawrkai tenau zawkte kum 60 an tlin hnuah pension pek
• Farmer Producer Organizations 10,000 siam thar.
• Pradhan Mantri Krishi Sinchayi Yojana hnuaia irrigation project zawng zawngte zawhfel vek.
• Loneitute pualin short term agricultural loan Rs nuai khat thleng pek a, hei hi kum 1-5 chhungin a pung awm loa rulh theih dan siam.
• Operation Digital Board hnuaiah secondary school zawng zawng tuam chhuah.
• Revitalising of Infrastructure and Systems in Education (RISE) kaltlangin higher education tan cheng vaibelchhe nuai khat dah.
• Management institute-a seat tihpun dan ngaihtuah.
• Law institute-a seat tihpun dan ngaihtuah.
• ‘Entrepreneurial Northeast’ scheme thar hnuaiah MSME tan leh hmarchhak state-a hna siamna tura sum lama puihna dah.
• Chhungkaw tinte pucca house neih tir vek.
• Thingtlanga chhunkaw retheite henah LPG gas cylinder connection pek vek.
• In tinin electric connection an neih theihna tura hma lak.
• Mitinte bank account neih tir vek
• Ayushman Bharat hnuaiah health and wellness centre nuai 1.5 siam.
• Medical college/postgraduate medical college thar 75 din.