SC-in VVPAT enfiah tur zat a tipung

Supreme Court chuan Lok Sabha inthlanpui neih tura Assembly bial tinah vote thlakna, Electronic Voting Machine (EVM) hman ruala an vote an enfiahna tur, voter-verified paper audit trail (VVPAT) pakhat zel enfiah tel tura tih chu panga-ah a tipung.

Court chuan inthlan neih tur chu dik tak leh lungawi thlak taka kalpui a nih theihna tur a ni tih a sawi nghal. Election Commission chuan SC thupek ang hian VVPAT hi assembly bial tinah hian a thawn belh nghal dawn tih a sawi.

Eptu party 21 hruaitute chuan inthlanpui neih turah hian Assembly bial tina VVPAT enfiah zat hi 50% a tihpun phutin court-ah hian ngenna an thehlut a, nimin khan an ngenna hi court chuan a ngaihtuah a ni. Eptu hruaitute phut ang zat chu a pawmpui lo a, mahse VVPAT pakhat zel enfiah tura tih chu panga-ah a tipung thung.

Court chuan VVPAT enfiah zat tihpun dawn vang hian thawktu dah belh a ngai lo a, result pawh a tihkhawtlai phah dawn lo tih a sawi. Election Commission chuan eptu hruaitute ngen anga VVPAT 50% te chhiar tel vek a nih chuan result tichhuah hun thlengin a nghawng thei dawn tih a sawi a, a chhiar hun a rei dawn vangin result puan hun hi ni nga thleng velin a tlai phah thei tih a sawi a ni.