EC in Congress campaign theme song chang khat paih tir

Thailand-a eptu pawl, political party din thar Future Forward hotu Thanathorn Juangroongruangkit chu sorkar laka hel tura midangte fuihah puh niin thubuai siamsak a ni.

Future Forward party hi party thar ni mah se thla hmasaa inthlanpui an neihah khan an che ṭha hle a ni, vote maktaduai 6.2 hmuin pathumna an ni pha a ni.

Nimin khan Thanathorn hi Bangkok-a police station-ah a inlan a, amah thlawptu mi tam takin an zui a ni.

Kum 40 mi, Thanathorn hi hruaitu chak tak niin, ṭhalaiten an lawm zual a, inthlan dawn pawhin kum 2014 aṭanga an rama roreltu, sipai sorkar paithla turin ṭhalaite a fuih nasa hle. Inthlan zawh hnuah Prime Minister Prayuth Chan-ocha paithlak a nih ngei theih nan eptu ṭangrual pawl Forward Party hi a zawm a ni.

Thanathorn chuan thubuai an siamsak hi kum 2015-a sorkar laka nawrh huaihawttu a thlawp vang niin a sawi. Thanathorn hi Thai criminal code palzutah puhin a thubuaiah hian thiam loh chantir a nih chuan kum kua thleng lung-in tantir theih a ni ang. Hei bakah hian parliament member a nihna aṭangin ban theih a ni dawn bawk a ni. Thanathorn chuan an puhna te hi politics lama a dinhmun tihchhiat an tumna vang niin a sawi a, tihsual a neih loh thu sawiin, hei hi ama chungchang bik ni loin rorelna dik dinchan tir tuma hmalatute an beihna zawk a ni, a ti.