CBI-in Lalu Prasad bail dilna dodal

Cetral Bureau of Investigation (CBI) chuan Rastriya Janata Dal (RJD) hotu Lalu Prasad-a'n Supreme Court-a bail a chhuah a dilna chu dodalin, bail-a chhuahtir a nih chuan Lok Sabha inthlanpui awm tura politics lamah a inhmang zui ngei dawn a ni, a ti.

Lalu Prasad hi Bihar chief minister a nih laia central sorkar aṭanga ranchaw man tur sum pek ṭhahnem tham tak tichingpenah puh a nih vangin thubuai eng emaw zatah thiam loh chantir a ni a, Ranchi-a Birsa Munda Central Jail-ah a tang mek a ni.

CBI chuan nimin khan Chief Justice Ranjan Gogoi-a kaihhruai bench hnenah Lalu Prasad-a'n bail-a chhuah a dil chungchangah phalna pe lo turin an ngen a ni. CBI chuan Lalu hi thla riat chuang zet hospital-ah enkawl a ni a, heng chhung pawh hian politics thilah an inrawlh zui reng a ni, a ti. Lalu hian a dam ṭhat loh avangin jail chhungah pawh a awm thei lo nia a insawi laiin, tuna a chak thar thut leh bail a dil chu Lok Sabha inthlanpui lo awm tur vang mai nia an ngaih thu an tarlang bawk.