Theatre artist 800 chuang ten ngenna siam

Ramchhunga theatre artist 800 chuang awmna, Artist Unite India chuan thuchhuah inṭawm siamin, Lok Sabha inthlanpui lo awm turah mipuite ṭhendarhna policy kalpuitu chu paihthla tura sawmin, BJP kaihhruai NDA chu na takin an sawisel.

Kumin inthlanpui awm tur chu Indi ram chanchina inthlan pawimawh tak a ni dawn tih sawiin, artist-te chuan BJP kaihhruai NDA sorkar chu ram mipuite inkara inthliarna siamtu, inhuatna leh tharum thawhna tihluartu a ni tih an sawi.

Thuchhuah an siamah hian India ram chu dinhmun him lo taka a awm mek a ni tih sawiin, ram danpui pawh dinhmun derthawng takin a awm a ni, an ti. Thudik tak auchhuah puitute chu ram dodaltu tia puh an ni zel tawh a, inhuatna chi chu tuhin a awm mek tih an sawi. Hetianga nitina inhuatna rilru tuha a awm chho mek hi tihtawp a hun tawh a ni tiin, he thuchhuah hi ṭawng chi hrang 11 in an tichhuak a ni.

"Democracy ramah chuan a chak lo ber leh berh berte chu tuam hlawm an ni tur a ni. Democracy chu zawhna, inhnialna leh insawiselna te tel loin a kal thei lo. Mahse tuna rorellai sorkar chuan hengte hi a awpbet vek a ni. Kum nga kalta ram tana hmasawnna thlena thuneihna changtu BJP khan, Hindutva tundin tumtute chu duh thala an chet theihna tura zalenna pein, inhuatna leh tharum thawhna politics te an kalpui ta a ni" tiin Ariste United India thuchhuah chuan a tarlang.