Farm law : SC ruat Panel-in report thehlut

Supreme Court-in farm law thar pathum, Farmers' Produce Trade and Commerce (Promotion and Facilitation) Act, the Farmers (Empowerment and Protection) Agreement on Price Assurance leh Farm Services Act, and the Essential Commodities (Amendment) Act chungchang zirchiang tura committee a din chuan report an thehlut tawh tih member zinga pakhat chuan a sawi.

Ram chhunga loneitute nasa taka an dodal mek, sorkar laipuiin farm law pathum a siam tharte chungchang zirchiang tur hian Supreme Court chuan January thla khan member pathum awmna committee hi a lo din tawh a ni. Member-te hian loneitu pawl 85 aiawhte leh stakeholder hrang hrangte an kawm a ni.

Hetih lai hian loneitu pawl 40 telna, Samyuk Kisan Morcha (SKM) chuan Supreme Court committee din hi an pawm lo tih an sawi thung.

Committee member, agricultural economist Anil Ghanwat chuan March 19 khan report hi an thehlut tawh tih a sawi a, mahse 'confidential' a nih thu sawiin, report-a an tarlante erawh a sawilang lo. April 15-ah court hearing neih a ni ang.

Loneitute chuan farm law thar hi duh lohin lungawi lohna an lantir chhunzawm zel a, Delhi border-ah nikum November thla aṭang khan ram chhung hmun hrang hrang aṭanga loneitu kalkhawmte chuan nawrh an la huaihawt a ni. Loneitu pawl leh sorkar laipui aiawhte chuan inremna kawng zawngin ṭum eng emaw zat inbiakna an nei tawh a, mahse tun thlengin inremna an la siam thei lo. Loneitute hian farm law thar pathumte sut vek turin an phut a, mahse sorkar chuan sut lo a, a ṭul anga siamṭhat a duh ve thung a ni.