Delhi private hospital-te ICU khum siam belh turin hriattir

Delhi-a Aam Aadmi Party (AAP) sorkar chuan khawpui chhungah Covid-19 hri kai an pun chak leh avangin private hospital 33-te hnenah hri kaite enkawlna turin ICU khum siam belh turin a hriattir.

Delhi health minister Satyendar Jain chuan, "Private hospital-te hnenah ICU khum 220 siam belh turin kan ngen a, private hospital lian zualte hnenah pawh an ward-a khumte chu siambelh turin kan ngen bawk a ni," a ti.

Sorkarin a tarlan danin, Delhi-ah hian Covid-19 kai enkawlna tur damdawi-inah khum 5,815 a awm a, heng zinga khum 1,799 chu luah mek niin khum ruak 4,016 a awm. Covid-19 ICU khum 787 awmah 98 chu luah mek a ni bawk.

Thawhlehni khan Delhi sorkar chuan khawpui chhunga hri leng dinhmun thlirin review meeting a nei a, hri kai enkawlna tur damdawi-in khumte chu luah khah ni lo mah se, hri kai an pun chhoh leh avangin a ṭul anga lo inbuatsaih lawk a ṭul thu an sawi a, hei vang hian khum siam belh hi an rel a ni. Delhi-ah hian Thawhlehni khan hri kai thar 922 an awm belh a ni.