Ashok Gehlot sorkarin Rajasthan Diwas-ah tang 1,200 an chhuah
Rajasthan-a Ashok Gehlot kaihhruai Congress sorkar chuan Thawhlehni khan Rajasthan Diwas pualin tang 1,200 an chhuah zalen.
Rajasthan sorkarin tang a chhuah zalente hi an state chhung tan-in hrang hranga mite niin a tam ber hi chu an nungchang ṭhat vanga an tan hun tihtawia an tan hun zo tawhte an ti a, eng emaw zat chu natna neih vang leh kum upat vangte a ni hlawm.
Sorkar chuan natna nei zingah hian cancer, AIDS leh phar natna veite chu an tan hun a zawh hmain chhuahtir theih an nih thu tarlangin, India today chuan tang chhuang zinga an kawm theihte chuan an nun siam ṭhat chhunzawm zel an tum thu an tarlang.
Rajasthan Chief Minister Ashok Gehlot chuan,"Tan-ina tang, kum upa leh natna hlauhawm tak neite chu Covid an kai lohna atana venhim an nih theihna turin chhuah an ni. Cancer, AIDS, phar leh mitdelte pawh chhuah zalen theih an ni bawk. Anni bakah chuan kum upa lam, mipa kum 70 chin chunglam leh hmeichhia kum 65 chin chunglam, an tan hun tur hmun thuma ṭhena hmun khat tang tawhte pawh chhuah an ni bawk ang," tiin tang an chhuah hma hian a lo sawi tawh bawk a ni.