Lok Sabha election Phase 1: EVM ṭha lo a tam, hmun tam takah buaina a chhuak

12th April, 2019

Lok Sabha inthlan thawh khatna chu nimin khan state leh union territory 20-a constituency 91-ah neih a ni. Hmun hrang hrangah buaina chhuak report a awm a, vote thlakna Electronic Voting Machine (EVM) eng emaw zat chu hman theih lohin thlak a ngai bawk.

Andha Pradesh-a Anatapur biala intihbuaina thlengah Telugu Desam party worker pakhat a thi. Andhra Pradesh Chief Election Officer chuan EVM 362 chu a chhiat thu leh, hengte hi thlak an nih thu a sawi. AP-ah hian Guntakal biala Jana Sena Party candidate Madhusudan Gutpa chu EVM a tihchhiat avangin man a ni. Gupta hi vote thlak tura a kalin constituency hming chu an tarlan ṭhat tawk loh vangin polling staff-te chungah a lungawi lo a, EVM chu lain chhuatah a paih a, khawl hi hman chhunzawm tlak lohin a chhia a, amah pawh man nghal a ni.

Maharashtra-a inthlan neihna bialah IED a puak a, mahse thi leh hliam an awm erawh hriat a ni lo.

Uttar Pradesh-a Sahmli bialah chuan mi ṭhenkhat, voter ID card tel loa vote thlak luih tum an awm a, heng mite hnawhdarh nan hian BSP sipaite chuan silaite an hmetpuak a ni.

UP-a Nodia bialah ei tur, a kawma NaMo tih inziak chu sem a ni a, vote thlakna polling booth aṭanga meter 200 bialah political party kaihhnawih thil reng reng khap a nih avangin complaint thehluh nghal a ni a, mahse police-te chuan an enfiah hnuah ei tur sem-a NaMo tih chu Prime Minister Narendra Modi kaihhnawih lam ni loin, a siamtu brand hming niin an sawi. UP-ah vek hian BSP voter, a bikin Dalit hnam vote thlak tumte chu dan luih an ni a, EC hnenah hemi chungchang hi thlen nghal a ni bawk.

Jammu and Kashmir-a Poonch bialah chuan EVM-a Congress button chu hmeh theih lohin a awm niin National Conference leader Omar Abdullah chuan a sawi a, hei bakah hian hetiang harsatna hi polling booth dang paruk velah a awm nia sawi a ni. Polling officer chuan button ṭhat loh chhan hi an hriat loh thu sawiin, khawl pakhatah chauh ni lo a dang eng emaw zatah hetiang hi a awm tih a sawi a, heng khawlte hi thlak nghal a nih thu a sawi.