Inkharkhip thlahdulna Dan tur sorkar laipuiin puang

Sorkar laipui chuan Inrinni khan thuchhuah thar siamin vawiin aṭanga inkharkhip thlahdul dan tur a tichhuak a, state leh union territory containment zone-a puante erawh hei hian a huam ve dawn lo a, June 30 thleng inkharkhip chhunzawm a ni dawn thung. 

Green zone leh orange zone-ah chuan zing dar 5 aṭanga zan dar 7 thleng chuan activity hrang hrang a tihtheih tawh dawn a, state chhung bakah state dang inkal pawhnaah pawh khuahkhirhna a awm dawn lo. Intra leh inter state inkalpawhna tur pawhin permit emaw phalna dang emaw dil a ngai tawh dawn lo a ni.

Sorkar laipuiin kaihruaina thar a siamah chuan hnathawhna leh sumdawnna hmunte pawh hawn chhoh a ni dawn tawh a, June 8 aṭang chuan hri kai tamna bial tih lohah chuan mall, hotel, restaurant leh sakhaw hmun te pawh hawn a phalsak chho tawh dawn a ni. 

Zirna in hrang hrang- school, college leh coaching institute-te chu June 30 thleng khar chhunzawm a ni dawn.

Thlawhtheihna hmanga ramdang nena inkalpawhna, sorkarin phalna a pek chin bak erawh chu khuahkhirh chhunzawm a la ni dawn a, Metro Rail, Cinema Hall, Gymnasium, Swimming pool, entertainment park, theater, bar, auditorium, assembly hmun leh sakhuana thil pawh huama mi tam tak punkhawmna chu rampumah khuahkhirh chhunzawm a la ni dawn bawk. 

Directorate General of Civil Aviation (DGCA) chuan Inrinni khan International flight chu June 30 zan lai thleng la tihtawp lailawk a nih thu a tarlang.

March 25-a lockdown hmasa ber hman a nih aṭang khan ram chhung thlawhtheihna, domestic flight chu tihtawp lailawk rih a ni a, mahse vawiin aṭang chuan ram chhung thlawhtheihna hi thlawh phal a ni tawh dawn thung.