Delhi : Congress leh AAP thawk dun leh dawn lo

Delhi-a Lok Sabha inthlan neih turah rorellai Aam Aadmi Party (AAP) leh Congress party chuan thawhdun tumin inremna pawh an siam tawh niin an sawi a, mahse nimin khan Congress chuan inthlan hi party malin an chuh dawn tih a sawi leh.

Party in-charge for Delhi PC Chacko chuan Delhi-a Lok Sabha seat pasarih chu party mala an chuh vek tur thu sawiin, AAP nena BJP paihthlak a nih theihna tura thawhdun an tumna a hlawhchham chhanah AAP hruaitute a puh.

Nimina New Delhi-a press conference a neihah Chacko chuan, "Vawiin thlengin AAP nena thawhdun a, an tan seat li dah a, Congress tan seat thum daha inremna siam hi kan la inhuam reng a ni", a ti. Chacko chuan AAP aiawh, Rajya Sabha MP Sanjay Singh nena inbiakna an neihah khan party pahnihte chuan seat insem dan chungchangah pawh an inhrethiam tawn hle nia a hriat thu a sawi.

Chacko chuan "Delhi inthlan hnuhnung berah khan INC hian vote 21% hmuin AAP hian 26% a hmu a, kan pahniha kan vote hmuh hi 47% a tling a ni. Hemi behchhan hian Congress chuan seat thum changin, AAP chuan seat li chang se tiin, hei hi kan inbiaknaa kan lo sawi tawh dan a ni", a ti. Mahse inremna an siam thei tawh nia an ngaih hnuah AAP chuan thuchhuah siamin, Congress chuan an duh ang a zawmpui thei lo niin an sawi leh a, hei hi thu dik lo a ni tiin hei vang hian party mala inthlan hmachhawn mai hi an tum ta tih a sawi a ni.