NaMo TV ah pre-certified content chauh tihchhuah phalsak

Election Commission chuan Prime Minister Narendra Modi-a puala TV channel siam, NaMo TV chu poll panel-in phalna a pek chin chauh tichhuak turin a ti.

Congress party chuan NaMo TV chungchangah EC-ah hian complaint a thehlut a, hei hi a ngaihtuah hnuin EC chuan thupek hi a tichhuak a ni.

EC thupekah hian NaMo TV-a tihchhuahte hi Media Certification and Monitoring Committee (MCMC) in phalna a pek a awm lo tih a sawi. He channel-a political content programme hrang hrangte chu Commission order tihchhuah tawhin a huam chin an ni tur a ni, a ti. Hei bakah hian political advertisement te pawh tihchhuah a nih hmain MCMC hian phalna a pe phawt tur a ni tiin a sawi.

NaMo TV-ah hian PM Modi thusawi leh campaign-na bakah BJP kaihhnawih thil chauh tihchhuahna a ni. March 31 aṭang khan DTH (direct-to-home) network hmangin tihchhuah ṭan a ni.