Covid-19 kai hmuh chhuah thar tam ber ni a thleng leh

Hripui lengin ziaawm lam a pan thei lo a, Health and Family Welfare Ministry report thar berah chuan hri kai hmuh chhuah thar mi 8,380 an awm a, hei hi hmuh chhuah thar tam ber record a ni leh.

Hrikai hmuh chhuah thar tam ni ber hi ṭum eng emaw zat a thleng tawh a, niminah pawh hian a record thar a awm leh a ni.

India rama Covid-19 kai tawh zawng zawng hi 1,82,143 an tling tawh a, kai mek 89,995 awmin enkawl dam tawh 86,984 an awm. Hripui thihpui tawh 5,164 an awm bawk. 

Enkawl dam tawh rate hi 47.75% a ni a, report an tihchhuah hma darkar 24 chhungin mi 4,614 enkawl dam an awm a ni. Mi 193-in an thih belh thung. 

Maharashtra chu state mala hrikai tam berna an ni chho zel a, mi 65,168 laiin kai tawhin hmuh chhuah thar 2,940 an awm. Vei mek 34,890 an awm laiin enkawl dam tawh 28,081 an awm a, darkar 24 chhungin 1,084 an enkawl dam a ni. Maharashtra-ah ringawt hian mi 2,197-in an thihpui tawh a, mi 99-in an thihpui leh a ni.

Tamil Nadu-ah chuan mi 21,184-in an kai tawh a, hmuh chhuah thar 938 an awm. Enkawl dam tawh 12,000 awm thungin mi 160-in an thihpui tawh a, mi parukin nimin report-ah hian an thihpui thu an tarlang.

Delhi-ah pawh mi 18,549 laiin an kai tawh a, Tamil Nadu aiin an kai hmuh chhuah thar an tam zawk a, 1,163 an awm. Mi 416-in an thihpui tawh bawk.

Gujarat-ah chuan mi 16,343 hmuh chhuah an ni tawh a, 409 hmuh chhuah thar awmin mi 27-in an thihpui leh a, thihpui tawh zawng zawng chu Delhi leh Tamil Nadu aia tamin 1,007 an tling ta a ni.