India-ah Covid-19 hri kai thar 81,466 an awm Thla ruk chhunga hri kai thar tam ber ni thleng
India ramah Ningani khan Covid-19 hri kai thar mi 81,466 an awm leh a, thla ruk chhunga ni khata hri kai thar an tam ber ni a ni.
Hemi ni vek hian hripui vanga thi mi 469 awm bawkin, nikum December 6 hnuah ni khata hri vanga thi an tam ber ni a ni bawk.
Nikum October 2 hnua ni khata hri kai thar tam ber nia Covid-19 kai hmuh chhuah zinga 84.61% hi state pariat - Maharashtra, Chhattisgarh, Karnataka, Punjab, Kerala, Tamil Nadu, Gujarat leh Madhya Pradesh-a mi an ni tih union health ministry chuan a tarlang.
All India Institute of Medical Sciences (AIIMS), Delhi-a an hotu Dr Randeep Guleria chuan ram chhunga hri kai an pun chak leh chhan chu coronavirus hri chi thar vang niin a sawi. Hri kai thar an pun chak leh avangin state eng emaw zat chuan khuahkhirhna khauh zawk siamin, school khar te an rawt leh mek a ni.
Maha-in Covid-19 test man tihniam
Ram chhunga hri kai tamna leh thihpui tamna ber, Maharashtra-ah chuan hri kai thar an la pung chak hle. State sorkar chuan hri leng laka invenna tur kaihhruaina a siamte pawh khauh zawkin a kalpui a. Test tam zawk neih a nih theihna atan RT-PCR test man chu Rs 1,000 aṭangin Rs 500-ah a tihniam a, RAT test man pawh a tihniam bawk.
Ningani khan Mumbai khawpui bikah hri kai thar mi 8,646 awmin, nikum kumtir lama he khawpuia hripui a len hnuah nikhatah hri kai thar an tam ber ni a ni. Ningani vek khan Mumbai-ah hian hripui vanga thi hi mi 18 an awm bawk a ni.
Delhi CM hoin emergency meeting nei
Delhi khawpuiah pawh hri kai thar an pun chak leh avangin nimin khan chief minister Arvind Kerijwal hoin emengency meeting neih a ni. Delhi-ah hian Ningani khan hri kai thar 2,790 awm belhin, a hma ni aia hri kai an punna hi 53% zet a tling.
Meeting-ah hian health minister Satyendar Jain leh health department lama official-te an tel a, hri darh zel tur venna atana hma lak dan turte an rel a ni.
UP-ah April 11 thleng school khar dawn
Uttar Pradesh sorkar chuan hri kai an pun zel avangin state chhunga school, Class 1-8 te chu April 11 thleng khar turin nimin khan thupek a tichhuak.
Sorkar hian a hmaa thupek a lo tihchhuahah school-te hi April 4 thleng khar turin a ti a, mahse hri leng hian ziaawm lam a pan mai loh avangin April 11 thleng school khar turin hian a ti leh a ni. Class 8 chunglam erawh chu kal chhunzawm a ni ang a, mahse heng hmunah pawh Covid-19 protocol chu khauh taka kengkawh tura tih an ni.
Chief minister Yogi Adityanath chuan hri darh zel tur venna atan test pawh tam zawk nei turin official-te a chah.
Pune-ah mall, cinema hall leh hotel khar
Pune deputy chief minister Ajit Pawar hoa meeting neihah, hri darh zel tur venna atan nimin aṭanga ni sarih chhung chu khawpui chhunga mall, cinema hall leh hotel-te khar vek turin an rel. Zan dar 6 aṭanga a tuk zing dar 6 thleng curfew puan a ni bawk.
Pune divisional commissioner Saurabh Rao chuan ni sarih chhung restaurant, bar leh ei tur zawrhna dawrte khar an ni dawn a, mahse home delivery erawh phalsak an ni tih a sawi. Pawn lamah mi panga aia tam awmkhawm khap a ni bawk.