Shramik Special train-ah mi 80 thi

Inhlawhfa leh tangkhang haw mek, Shramik Special train-a chuang mi 80 chu chhan hriat lohin an thi. 

An tihchhan hi hriat chian ni lo mah se Railways lam chuan chhui chian an tum.

Covid-19 hri leng vanga ram pum huapa inkhuahkhirhna kalpui a nih avangin ram chhunga inhlawhfaa state danga awmte chuan harsatna an tawk a, hei vang hian sorkar chuan an mahni state-a hawna tur Shramik Special train chu a buatsaihsak a ni.

Thite hi East Central Railway zone, North Eastern Railway zone, Northern Railway Zone leh North Central Railway zone-a rela chuangte an ni. Railway Minister Piyush Goyal chuan nau pai, kum 65 chunglam leh kum 10 hnuai lamte chu a ṭul viau a nih loh chuan Shramik Special train-a mahni khaw lama haw lo turin a hriattir nghal.

Rel-a chuang thite hi chaw ei tur an tlakchham vang a nih an rin thu mi ṭhen­khat chuan an tarlang tih Piyush Goyal chuan a sawi a, Railways chuan rel chuang zinga natna nei an awm chuan rel tih din a nih thu leh damdawi-in hnai bera pan pui ṭhin an nih thu a sawi. 

Railways hian rela thi tam zawkte hi natna neisa, haw tuma rel a chuang ve ta mai an nih thu a tarlang.