Fimkhur lehzual a ngai : Prime Minister Modi

Prime minister Narendra Modi chuan nimin khan thla tina radio programme a neih ṭhin, Maan Ki Baat a hmang leh. 

Minute 30 chhung thu sawiin, PM chuan ram chhungah hnathawhna hmunte hawn chhoh a nih tak avangin mipuite chu fimkhur lehzuala an awm a ngai tih a sawi. 

Sorkar laipui chuan Inrinni khan ram chhunga lockdown kalpui mek chu June 30 thleng atan pawhsei a nih thu a puang a, mahse containment zone ti lohah chuan khuahkhirhna te thlah dul chhoh a ni tawh thung. 

Modi chuan, pawn chhuak loa ina a tam thei ang ber tawm turin mipuite a ngen a, midangte nena inhlat awm a, feet ruk dan tala awm te, pawn chhuaha mask vuahte chu a hma ai mahin a ṭulin a pawimwah tih a sawi. 

Hripui leng mek chuan khawvel ram tin a tibuai a, India pawh a bang bik lo a ni, tiin PM chuan mipuite hri leng vanga harsatna an tawhte a sawi. Mi hrang hrangin he hri leng hi an tuar chungin, mi rethei leh nitin inhlawhfate chuan an tuar zual a ni, a ti. Heng mite tawrhna hi a hriatthiampui thu leh ṭawng­kama sawifiah theih a ni lo tih sawiin, anni pui tur hian mitinin theihtawp an chhuah tih a sawi. Hri leng vang hian India ramah nitina inhlawhfa, mi vaibelchhe li vel chu hna thawh tur nei loin an awm mek a ni. 

Covid-19 leng mek do hna chu hna hautak tak, hun rei tak daih tur a la nih thu sawiin, PM chuan sorkar laipui chuan ram mipuite harsatna tawhte chu chinfel dan ngaihtuahin a ṭul angin hma a la mek a ni, a ti.