Yes Bank dintu Rana Kapoor man a ni

Kum 2004-a Yes Bank dintu Rana Kapoor chu Enforcement Directorate (ED)-ten ni hnih chhung thu an zawh hnuah, nimin khan Prevention of Money Laundering Act hnuaiah an man. ED hian Kapoor hi March 11 thleng an kawl ang. 

Kar kal ta Inrinni khan Mumbai-a ED office-ah Kapoor hi thuzawh fiah a ni tawh a, Mumbai-a Samudra Mahal residential tower-a a chenna in pawh dap sak a ni tawh bawk. Yes Bank chuan an mahni dawrtute (customer) hnenah khawi ATM aṭang pawha YES BANK Debit Card hmangten pawisa an lakchhuak theih thu an twitter kaltlangin Inrinni khan an tarlang. Mahse pawisa hi thla khatah Rs. 50,000 ai tam an la chhuak thei lo thung. 

Yes Bank in pawisa lama harsatna a tawh avang hian Reserve Bank of India (RBI) chuan Ningani zan khan April 3 thleng awh turin, he bank inrelbawlna chu thunun a nih theih nan bank thuneihna a laksak.

Yes Bank-a pawisa dahte chuan thla khatah Rs. 50,000 ai tam lachhuak thei lo turin RBI hian a thunun nghal a, eng emaw bik thil atan (medical care, emergency, higher education, leh inneih thilah) Rs nuai 5 thleng pek theih a ni thung. Bank board member pawh thlak nghalin, State Bank of India (SBI) Chief Financial Officer (CFO) Prashant Kumar chu Yes Bank hotu (administrator) atan dah nghal a ni.

Yes Bank-in RBI hnena aṭang bank din phalna (license) a neih hnu, kum 2004 khan he bank hi din a ni a, kha mi ṭuma Chief Executive Officer (CEO) Rana Kapoor chuan kum 10 chuang he bank hi a enkawl zui a ni. Kapoor enkawlna hnuaiah hian he bank hi India rama private bank lian ber pangana a ni thei a ni.

Kum 2018-a Kapoor hun (term) a tawp khan board member-te chuan RBI lamah CEO hna hi hun rei lote chhung la chelh turin an dil a, a tirah RBI chuan a phalsak lo. Hemi kum vek December thla aṭang khan loan rulh ṭhat loh tam tak a awm avangin RBI chuan Kapoor hi hotu nih chhunzawm a phal lo a, mahse CEO thar hmuh a nih hma chu Yes Bank hotuah RBI chuan a pawm ta tho a ni. India-a consulting firm pakhat Korn Ferry (advisory) kaltlangin Yes Bank CEO thar tur chu kum 2019 February thla chhunga hmu hman turin RBI chuan thuchhuah a siam a ni.

Korn Ferry rawtna angin CEO thar atan Ravneet Gill chu ruat a ni ta a, ani hian Yes Bank CEO hna kum khat dawn a thawk hman. Gill-a'n CEO hna a chelh chhung hian Yes Bank chhunga bank sumdawnnaah thil fel tawk lo a awm tih hriat belh a ni a, bank insiamṭhatna tura pawisa tihchingpen a awm tih hriat a ni bawk. Yes Bank-in thunun an tawh hma ni chiah khan CEO kalchhuakta Ravneet chuan RBI-ah foreign investor, Tilden Park Capital Management LP hnen aṭang investment tih phalna a dil a, RBI lam chuan an escrow account-ah US dollar mtd 500 dah tura Tliden Park hi an phut hnuah, Ningani zan khan Yes Bank chu khauh taka thununin a thuneihna a laksak zui ta a ni.

Yes Bank hian Syndicated loan leh Corporate banking hmangin sum a hailut ṭhin a, ADB, OPIC, European investment bank, Taiwan leh Japan bank aṭang tein sum a puk a, heng sum a pukte hi India ramchhunga sumdawng (small and medium enterprise) leh corporate liante hnenah a puk chhawn tir leh ṭhin a ni.

Heng pawisa Yes Bank-in a puk tirte hian an rul ṭha lo a, hei vang hian bank chuan Non Performing Assets (NPA) a ngah chhoh phah ta a ni. NPA hi ni 90 piah lama loan rul ṭha lote tih an ni bawk. Loan rulh loh chhekkhawl tam vang hian he bank hian pawisa che vel a ngah tawk lo a, pawisa kawl (stock) a neih tlem tak avangin RBI chuan thununna a chungah a lekkawh a ngaih phah ta a ni.Kum 2018-19 chhungin Yes Bank hian NPA Rs vbc 3, 277 a nei a ni.