Allahabad HC-in CAA dotute hming leh thlalak tar chungchang ngaihtuah

Allahabad High Court chuan nimin khan nikuma Lucknow-a Citizenship Amendment Act (CAA) dotu mi 53-te hming, thlalak leh address, Uttar Pradesh sorkarin a tartir chungchang a ngaihtuah dawn. 

Nimin zing dar 10 khan Allahabad High Court chuan he thil thleng hi ngaih­tuah a tum a, mahse Attorney General a hun taka a thlen theih loh avangin, tlai dar 3-a sawn a ni ta a ni. Police Commissioner leh Lucknow District Magistrate chu court hian a hun taka court-a inlan turin a hriattir bawk.

Court chuan eng danin nge heng thlalakte hi tar a ni tih Police Commissioner leh Lucknow District Magistrate-te chu a zawt a, chief justice Govind Mathur kahhruai court chuan he poster tarchhuah hian 'Right to Privacy' a kalh thu a sawi.

Kar kal ta Ningani zan khan Uttar Pradesh chief minister Yogi Adityanath thupek angin, Lucknow district admi­nistrator-te leh Lucknow police-te ṭangkawp chuan Lucknow khaw lailiah heng mi 53-te hming, thlalak leh address chu an tar chhuak a ni. Heng hming an tarchhuah takte sorkar thil an tihchhiat, cheng vaibelchhe 1.55 hu chu chawi tura tih an ni bawk a, an chawi theih loh chuan an bungraw thlenga chhuhsak theih an nih thu Lucknow district administrator-te chuan thuchhuah an siam.