SC-in insawifiah turin Rahul hriattir

Supreme Court chuan Congress president Rahul Gandhi chu Prime Minister Narendra Modi a sawina, 'chowkidar chor hai' (chowkidar rukru) a tih chu Supreme Court pawhin a pawmpui nia a sawi chungchang chu sawifiah turin a hriattir.

Supreme Court hian Rafale deal siam dan chungchangah document thar behchhana review petition thehluh a remtih sak hnuah, Congress president hian court pawh hian 'chowkidar chor hai' tia a sawi chu a pawmpui a ni, tiin a sawi.

Gandhi thusawi chungchangah hian BJP MP Meenakshi Lekhi chuan Supreme Court-ah petition a thehlut a, Gandhi chuan a mimal ngaihdan chu court rorel dan anga hmehbel a, court chu a duhdan ang hawia ngaihdan siamtir a tum a ni, a ti.

Mahse Chief Justice of India Ranjan Gogoi-a kaihhruai bench chuan court hian hetiang lam hawi hian engmah a sawi lo niin a tarlang. Hei vang hian Gandhi hi media leh mipuite hnena court chungchang dik lo taka a sawi chu sawifiah turin a ti a ni.

Bench chuan court in hetiang thlirna leh ngaihdan hi a tarlang lo tih sawiin, April 10 khan Rafale deal siam chungchangah petition thehluh nan document putru te chu an behchhan a remtih sak tih chiah a sawi niin a tarlang. Hemi rual hian Gandhi hi insawifiah tur chauha a tih thu leh, amah pawh court-a inlan kher a ngaih loh thu a sawi. April 22 thleng insawifiah turin hian hun pek a ni.