Muslim voter-te vau vangin Maneka Gandhi insawifiah turin ti

Union minister leh BJP hruaitu Maneka Gandhi chu Uttar Pradesh-a rally a neihnaah Muslim-te chuan an vote lo a nih chuan an tan hna a thawh­sak lo ang tia a vau avanga insawifiah tura tiin, Sultanpur District Election officer chuan show-cause notice a pe.

Turab Kahni khuaa election rally a neihnaah, Maneka Gandhi chuan Muslim-te hnenah in­thlanah a chak ngei dawn tih sawiin, nakin zelah a puihna an la mamawh dawn avangin amah chu vote ngei turin a ti. "Ka chak ngei dawn a ni. Mahse muslim-te puihna telloa ka chak a nih chuan ka lawm lo hle ang. Nakin zelah hna dilin Muslim te chu lo kal mah se, engnge a ṭangkaina ni tawh ang tiin ka lo ngaihtuah tawh ang", a ti.

Maneka Gandhi thusawi hi eptu party te chuan an sawisel nasa hle a, hnam leh sakhaw behchhana mipuite ṭhendarh tumah an puh. Muslim te vau a, a thuneihna dik lo taka hman a tum dan a tichiang nghal hle niin an sawi.