Eptuten VVPAT 50% enfiah phut

Eptu party hrang hrang hruaitute chuan nimin khan Supreme Court-ah petition thehlutin, Lok Sabha inthlanpuia vote thlaknaah Voter Verified Paper Audit Trail (VVPAT) slip 50% enfiah an phut.

Eptu party 21 hruaitute chuan Pathianni khan Delhi-ah press conference an nei a, inthlan neih mek chu langtlang taka kalpui a ni tawk lo nia an ngaih thu an sawi a, voter-te dikna chanvo chu venhim sak a ngai a ni, an ti.

Telegu Desam Party (TDP) hotu N Chandrababu Naidu chuan vote thlakna atan, Electronic Voting Machin (EVM) hi kan ringhlel fo ṭhin, hei vang hian voter-ten an rintawkna tur chuan VVPAT aṭangin an vote kha a dik ngei em tih an finfiah a ngai a ni, a ti. Ram changkang zawk, Europe ram hrang hrang angin vote thlakna atan hian paper ballot hman leh a ngai tih a sawi bawk. Naidu hian Inrinni zan khan Chief Election Commissioner Sunil Arora pawh hmuin, April 11-a Andhra Pradesh inthlannaa EVM hman tlak loh eng emaw zat awm chungchang pawh a sawipui a ni.

Congress hruaitu Abhishek Manu Singhvi pawhin inthlan kalpui danah zawhna tam tak a awm thu a sawi a, an party chuan dan lam kaihhnawih zawng pawhin auchhuah pui an tum tih a sawi. Vote thlak zinga 50% tal enfiah chu thil pawimawh a nih thu a sawi.

Supreme Court hian Lok Sabha inthlanah hian constituency tinah EVM panga-te chu enfiah zel turin a ti a ni.