EC-in Adityanath leh Mayawati te hrem

Election Commission chuan election campaign-naa inhuatna chawk tho thei zawnga thu an sawi avangin Bahujan Samaj Pary (BSP) hotu Mayawati leh Uttar Pradesh Chief Minister leh BJP hruaitu Yogi Adityanath-te chu a hrem.

Model Code of Conduct (MCC) an palzut vangin Yogi Adityanath chu tukin zing dar 6 aṭanga darkar 72, ni thum chhung a campaign khapsak a ni a, Mayawati chu darkar 48 a campaign khapsak a ni bawk. Hemi hun chhung hian public meeting, road show leh media interview te an neih khap a ni. Social media pawh an hman khapsak a ni bawk.

Mayawati hian April 7 khan Deoband-a joint rally neihah Muslim-te chu eptu ṭangrual pawl thlawp turin a ngen a ni. UP CM Adityanath hian April 9-a public rally a neihnaah Bajrang Bali chungchang sawichhuakin, Indian Union Muslim League chu 'virus' tiin a sawi a, hei bakah hian hmun danga a campaign-naah Indian Army-te chu Modi-a sipai tiin a sawi bawk a ni.

Nimin khan political party hruaituten election campaign-naa Model Code of Conduct (MCC) palzuta inhuatna chawk tho thei zawnga thu an sawi ṭhin chungchangah Supreme Court chuan Election Commission chu hma la ṭha tawk lo nia a ngaih thu a sawi. Hetih lai hian EC chuan MCC palzut an awm pawhin insawifiah tura hriattirna pek a, an bawhchhe chhunzawm leh a nih pawhin complaint thehluh mai loh chu tih theih dang a nei loh thu leh, disqualify tura thuneihna a neih loh thute a hrilh.

Chief Justice Ranjan Gogoi-a kaihhruai bench chuan poll panel thuneihna chin chu enfiah a ngai niin a sawi a, vawiin hian hemi chungchang hi ngaihtuahin he hunah hian EC aiawhte pawh tel turin a ti a ni.