SC-in Mayawati hremna sût duh lo

Bahujan Samaj Party (BSP) hotu Mayawati-i chuan inhuatna lam hawi zawnga thu a sawi avanga Election Commission-in darkar 48 chhung campaign a khapsak chu nimin khan Supreme Court-ah a khing let. Mahse court chuan Mayawati-i thu thehluh hi hnawlin hremna pek tawh hi a sut duh lo a ni.

Chief Justice of India Ranjan Gogoi chuan Election Commission chu an thupek avang chuan a harh chhuak ta nia an ngaih zawk thu sawiin, politician ṭhenkhatte chu an campaign te a khapsak ta tih a sawi. Hei vang hian hemi chungchangah hian thupek dang engmah siam a ngai lo tih a sawi a ni.

EC hian Uttar Pradesh Chief Minister Yogi Adity­anath pawh inhuatna chawk tho thei lam hawi thu a sawi avangin ni thum chhung a campaign a khapsak bawk.

Lok Sabha inthlanpui neih mekah political party hrang hrangte an campaign ngawrhin an ṭang hle a, hmun tam takah election model code of conduct (MCC) bawhchhiatna sawi tur a awm fo a ni. Eptute chuan rorellai, BJP party-te chuan MCC an bawhchhe nasa hle chungin an chungah EC chu a nem lutuk niin an sawi. Supreme Court pawhin EC chu dan bawhchhiate chunga a hma lak dan duh khawp loin zawhna pawh a siam hial a ni.

Mayawati leh Adityanath te bakah Samajwadi Party hruaitu Azam Khan pawh hrem a ni. EC chuan Azam Khan hi a khingpui BJP can­didate Jaya Prada chung­chang mawi lo taka a sawi avangin ni thum chhung campaign a khapsak. Union minister Maneka Gandhi pawh Muslim te vauna lam hawia thu a sawi vangin darkar 48 chhung campaign phalsak a ni lo bawk.

EC hian kum 2014 Lok Sabha inthlan lai khan BJP President Amit Shah leh Azam Khan-te chu MCC an palzut avangin Uttar Pradesh-ah public meeting leh rally an neih a lo khapsak tawh bawk a, BJP hruaitu Giriraj Singh pawh Bihar leh Jharkhand-a a campaign khapsak a lo ni tawh bawk a ni.