TN-a LS inthlan tur ṭhulh maithei

Tamil Nadu-a Vellore biala Lok Sabha inthlan neih tur chu he biala Dravida Munnetra Kazhagam (DMK) candidate nena inzawmna nei in pakhatah cheng vaibelchhe 11 man a nih vangin inthlan neih tur hi Election Commission chuan a ṭhulh tir maithei.

Income Tax official-te chuan kar kalta khan DMK hruaitu Poonjolai Srinivisan-a godown-ah pawisa fai tam tham tak hi an man a, he pawisa an neihna hi an chhui zui mek tih an sawi. Tamil Nadu chief electoral officer chuan he thil thleng hi Election Commission chuan a ngaihtuah mek a, inthlan hi kalpui chi a nih dawn leh dawn loh a ngaihtuah dawn tih a sawi a ni.

Hetihlai hian DMK hotu MK Stalin chuan IT official-te thiltih hi politics lama inbeihna niin a puh a, an party an vau tumna a ni, a ti.

Vellore-a inthlan neih tur hi ṭhulh a nih pawhin Tamil Nadu-ah hian thamna inpek kaihhnawiha inthlan ṭhulh a nih ṭum khatna a ni lo ang. Kum 2016 khan Thanjavur leh Aravakurichi assembly constituency-ah AIADMK leh DMK te chuan voter-te sumin an tham nasa nia sawi a nih vangin commission chuan inthlan neih tur hi a lo ṭhulhtir tawh bawk.