Hri kai thar 93,249 awm belh leh PM Modi hoin high-level meeting nei
Ram chhungah Covid-19 hri kai thar an pung chak leh hle tawh a, Inrinni khan hri kai thar mi 93,249 an awm, hei hi nikum September 19 hnua ni khata hri kai thar an tam ber ni a ni.
Hri kai an pun chak leh tak avangin nimin khan prime minister Narendra Modi hoin high-level meeting neih a ni a, ram chhunga hri leng mek dinhmun te, vaccine pek hna kalpui mek chungchangte an sawiho. Meeting-ah hian cabinet secretary, principal secretary to the Prime Minister leh health secretary-te pawh an tel.
Zirtawpni khan cabinet secretary Rajiv Gauba chuan high-level review meeting a lo ko tawh bawk a, state leh Union Territory-te chu hri darh zel tur venna kawngah rang tak leh theihtawp chhuaha hma la turin an chah. Test nei tam tur te, khuahkhirhna khauk tak siam turte leh, contact tracing kalpui ṭha turte, hri leng darh tur venna atana kaihhruaina siamte kengkawh ṭha turin a chah a ni.
Health ministry chuan Inrinnia hri kai thar mi 93,249 zinga 81.42% chu state pariat - Maharashtra, Karnataka, Chhattisgarh, Delhi, Tamil Nadu, Uttar Pradesh, Punjab leh Madhya Pradesh-a mi an nih thu a sawi.
Maha cabinet meeting nei
Ram chhunga hri kai leh hripui vanga thi tamna ber state, Maharashtra-ah chuan Inrinni khan hri kai thar mi 50,000 dawn an awm a, Mumbai khawpui bikah pawh mi 9,000 chuangin Covid-19 an kai thar a ni.
Hri kai an pun chak avangin nimin khan chief miniser Uddhav Thackeray hoin cabinet meeting an nei a, state dinhmun leh hma lak dan turte an ngaihtuah. Meeting neih hma hian CM chuan an state dinhmun azirin lockdown puan loh tur tih ngawt theih a ni tawh lo tih a sawi.
Sorkar laipuiin ram chhunga hri leng hluarna district 10 a tarlan zinga pariat chu Maharashtra state-a mi an ni.
Micro lockdown kalpui a ṭul - AIIMS chief
All-India Institute of Medical Sciences (AIIMS) Delhi hotu leh Covid Task Force member, Dr Randeep Guleria chuan ram chhunga hri leng hluar thar leh mek venna turin 'micro lockdown' kalpui a ṭul tih a sawi.
AIIMS hotu chuan mipuite inthlahdah chhoh vang leh hri chi thar vangin hri leng hi a hluar chho leh nia sawiin, community transmission a awm leh tawh a, hei hi thunun thuai a nih loh chuan health care system pawhin a tuar leh dawn a ni, a ti.
"Ram economy nghawng buai lo zawngin theihtawpa hma lak leh a ngai a, heng zingah hian ṭul bik thil ni loa zin veivah khuahkhirhna siam pawh a ngai a ni. Chawlh hmang tura zin chhuah tumte pawhin an zin hun hi sawnhla mai se, hei hian case la tam vak lohnaa hri put darh tur pawh nasa takin a veng thei ang," a ti.